Antonio Fernández Bordas (Ourense, 12 de xaneiro de 1870 - Madrid, 18 de febreiro de 1950) foi un violinista e profesor de música español. Discípulo de Pablo Sarasate e de Jesús de Mosteiro, accedeu á cátedra de virtuosismo de violín no Real Conservatorio Superior de Música de Madrid, institución da que foi director a partir de 1921.

Bordas foi home prodixioso na acomodación a diferentes situacións políticas: foi Director co réxime constitucional, coa ditadura de Primo de Rivera, coa monarquía agonizante, con case toda a República e durante os primeiros meses do franquismo ata a súa xubilación en 1940.